Browsing articles in "Hitzaldia"
nov 28, 2014
Bgaztelumendi

Danele Sarriugarteren bisita izango dugu Obabako Testiguek

Danele Sarriugarte

Apurtu da bikote bat eta barrura begira jarri zara; aurkitu dituzu zure kontraesanak, aurreko hausturetatik itxi gabeko zauriak, zure buruari esandako gezurrak. Erretako erraietan barrena ibili zara.

Horrelakoxea da Danele Sarriugarteren “Erraiak” eleberria, zuzenean barruko zaurietara doana. Asteazken honetan Obabako Testiguekin izango dugu, iluntzeko 19etan, Jolas Etxean. Gonbidatuta zaudete fededun eta fedegabeok!

nov 5, 2014
Bgaztelumendi

Stephane Hesselen gabardina bustia

Stephane Hessel

Euria ari du Añorgan. Euria ari du Etxe Handian, euria errepidean, euria 25aren Geltokian. Euria ari du, bere arintasun eta bere zama guztiarekin, 36an egin zuen bezala, 39an egin zuen bezala; Berlinen Bartzelonan Saigonen Kobanen Hiroshiman Parisen Santiagon egin zuen euri bera jausi da Añorgan, hilabetean ezkutatutako amorru guztiarekin eta buruak makurtu ditugu, euri tanta bakoitzak min emango baligu bezala, euri tanta bakoitzak aurrera botako bagintu bezala, eta ikaratuta eseri gara Jolas Etxeako pasta eta garagardo artera. Eta, bat-batean, gizon batek kapela eta gabardina beltza eskegi ditu Mikel Unanueren gaztetako argazkiak zintzilik dauden hormetan. Euriak astunago jo ditu Jolas Etxeako kristalak, leihoak apurtu eta barrura sartu nahiko balu bezala eta guk mundua madarikatu dugu; AHTko zuloak eta Txartel Beltzak eta Bankia eta CAN eta Ziburuko auzapeza eta garagardoa bukatu zaigunean edalontzi hutsak madarikatu ditugu harik eta gizonak mahaia jo duen arte. Dardar egin dute hormek, euri tantak isildu egin dira eta oihuka lehertu da gizona: “Haserretu zaitezte, haserretu zaitezte!”. Eta korrika atera gara kalera; paper bustiak ikusi ditugu haizetan hegaka, errepideko autoen gurpil gastatuetan itsatsiko diren paperak, Giza Eskubideen Nazioarteko Karta edo auskalo zer dioten, nork daki, guk lasterka jarraitu dugu “haserretu zaitezte, haserretu zaitezte!” oihuak haizeak dakartzala eta iraultza egitea erabaki dugu baina euria ari du, inoiz baino euri gehiago ari duela iruditu zaigu, eta tabernan sartu gara aterpe bila.

oct 30, 2014
eneko

Bueltan dira Obabako Testiguak!

Kaixo Añorgatar fidel hori!

Urte bete luze orri hau eguneratu gabe eta bada garaia!! 2014-2015 urtea kulturaz gainezka dator, baina horretan sakondu aurretik inminenteki datorren Obabako Testiguon hilabeteroko zita plazaratzera gatorkizue.

Ezagutzen ez duzuenontzat, Obabako Testiguak irakurle kluba da. Hilabetero liburu bat proposatuko dugu eta baita zita jarri ere liburu horren inguruan gogoeta, hausnarketa, edo dena delakoa adierazteko. 3 hilabeteko zikloak izango dira, lehenik literatura unibertsala jorratuko dugularik, bigarrenik antzerkia, poesia edota saiakera landuko dugularik eta azkenik, euskal literaturako liburu bat irakurriko dugularik. Azken honetan, idazlea gonbidatu eta berarekin sakonduko dugu berak idatzitako liburuan. Hau dena, kafe eta pastaz hornituta.

Beraz, eta aurkezpenak eginda, datorren azaroaren 5erako, asteazkenez, arratsaldeko 19etan Jolas Etxeako liburutegira dei egiten dizuegu Stéphane Hesselen HASERRETU ZAITEZTE liburuari buruz hitz egitera. Liburua behar bazenu, idazkaritza@anorgakke.org helbidean eska dezakezu.

Literatur gose bazara, zure zain gaude!

Stephane Hessel

Haserretu zaitezte! Stephane Hessel

 

 

mar 14, 2013
eneko

Korrika 18 Añorgan!!

Bi urtez behin iristen da Korrika gurera, eta nahiz eta aurten Añorgatik ez den pasako, auzoko hainbat eragilek programazio kultural paregabea osatzeari ekin diogu. Tartean, Amassorrain ikastola eta bertako Guraso Elkartea, Añorgako Gazte Asanbladako Txantxangorri Taldea, Museum Cemento Rezola, Añorgako jubilatuak, eta nola ez, Añorga Kultur eta Kirol Elkartea aritu gara elkarlanean.

Ondorengo programazioa eskaintzen dizuegu gustuko izango duzuelakoan:

Martxoak 20 asteazkena: “Urak dakarrena… glu glu glu glu” antzezlana izango da 19.30etan Museum Cemento Rezolan (Dohain)

Martxoak 21 osteguna: Obabako Testiguok “Sexual Herria” liburua izango dugu hizpide pasta eta kafe artean (Dohain)

Martxoak 22 ostirala: Amassoraingo haurrak Korrika Txikiaz gozatuko dute Añorga Txikitik zehar goizeko 10etan eta Orixe Sariko Finala jokatuko da 20.30etan Jolas Etxean (Afaria 16€ bazkideentzat eta 18€ besteentzat).

Martxoak 23 larunbata: 17.30etan Buruhandiak ibiliko dira Añorgan zehar, 18etan Herri kirol, Jolas eta eskulanak izango dira haurrentzat, 19etan Kantujiran abesteko aukera izango dugu eta Txokolatada banatuko da; eta 19.30etan, Trikitixaz lagunduta Ibaetara abiatuko gara Kilometroa korritzera.

Añorga KORRIKArekin bat!!

Animatu!!

feb 18, 2013
Bgaztelumendi

Virginia Wolf dator gurekin pastak jatera

Nola ikusten zuen mundua Virginia Wolfek? Zer du berezi bere begiradak? Zer egin zuen Clarissa Dallowayk loreak erostera joan zen goiz hartan? Nolakoa zen Clarissa Dallowayren bizitza? Nolakoa izan behar zuela zioen gizonek eraikitako munduak? Nola ikusten zuten gainerako emakumeek? Eta berak? Berak nola ikusten zituen gainerakoak? Eta nola ikusten dugu mundua guk?

Erantzunik ez dago gure poltsiko zulatuetan, baina galderak egitera elkartuko gara ostegun honetan, iluntzeko 19etan, Jolas Etxean. Ohi bezala, liburu bat, begirada asko eta kutxa urdineko pastak.

ene 29, 2013
Bgaztelumendi

Arantxa Urretabizkaiaren bisita

“Zergatik, panpox, zergatik dauzkak hire aitaren begiak, hire aitaren ezpainak, hire aitaren ile kizkurtu hori, eskuak trabatzen dizkidana, zergatik, panpox. Bai, behar haut, blandinblup bat duk mundu hau, eskuekin desegiten moldatzen apurtzen ditek gizonek, eta hementxe geratu nauk, etxe batean preso, maitasunean preso. Esna igarotzen dizkiat gauak, atea zabalduta, Txema, hire begiak jantzita etorriko delakoan. Baina egunsentiak hire negarrekin esnatzen naik, eta ez zakiat zer egin, erlojuei obeditzea besterik; eta gosaldu dutxatu jantzi eskolara eraman eskolatik itzuli eta berriz buelta eskolara jaso autoan ekarri errieta egin afaldu ipuina kontatu eta lotara; hire bizitza duk nirea eta ez zakiat, ulertzen diat Txemak zergatik egin zian ihes, askeegia huen hemen egoteko, ni ere izan ninduan aske, panpox, ez pentsa, hala amestu nian behintzat, gizarteak maitatzeko bezain ederra nintzen garai urrun horietan ederra izan ninduan, baina ama nauk orain, eta hilerokoa etortzear zeukeat eta ez diat nahi, ez diat bizitzarik sentitu nahi nire barruan, hi laztandu baino ez, hi panpox, hire aitaren begiak jantzitako panpinatxo eder hori…”

Zer, barrua itotzen sentitu duzue? Eredu patriarkala ulertzen hasi nahi, mundu berri bat sortzeko? Ba zatoz Obabako Testiguetara, Virginia Wolfen “Mrs Dalloway” liburua besapean hartuta, eta mundu berri batekin egingo dugu amets. Otsailaren 21ean, adibidez?

ene 23, 2013
eneko

Arantxa Urretabizkaiarekin solasean

Urtarrilaren 24ean, arratsaldeko 19etan Jolas Etxeako jangela txikian izango da gurekin Arantxa Urretabizkaia idazlea. Obabako Testiguek “Zergatik Panpox” liburua aukeratu zuten feminismoaren 3 hilabeteko zikloari hasiera emateko, eta horren inguruan solastuko dira pasta eta kafea dastatzen duten bitartean.

Doako sarrera izango duen ekimena da, beraz, aprobetxatu eta agertu!

ene 4, 2013
Bgaztelumendi

Armiarmak Jolas Etxean

Armiarma bat zintzilikatu zaigu Jolas Etxean; euskal poesian Lore-Jokoak iragarri dizkigu, hemendik aurrera idazleak Ferrari fosforitoetan joango omen dira telebista-tertuliatik telebista-tertuliara; “kanitxeek” idatziko dituzte liburuak ostruka lumak Txinako mendi garaienen bihotzetatik hegazkin partikularretan ekarritako tinta arrosetan murgilduz, “guau guau” (denok ikasi behar izan dugu zerbait gutxi batzuk dena ikas ez dezaten); Kontxako Badian bainatuko dira irakurleak abenduan ere hemendik aurrera Andaluzia tropikaleko tenperatura izango baitugu Euskal Herrian, Potosin orain dela lau mende izan zuten tenperatura atsegin bera, eta bainujantzi ausartez jantzita telebista-aurkezle irribarrez irakurriko dituzte Sarriren, Atxagaren, Canoren eta Matxainen poemak hatz-mamietatik doiki irristan doazen itsaso tanta gaziek liburuetako letrak nola itxuraldatzen eta ezabatzen dituzten ohartu ere egin gabe. Armiarma hiztun bat kausitu dugu mantel zuriaren gaineko Copenhagen kutxatxo urdinaren gainean (zeldetan zenbat pasta antolaturik, zenbakiturik), eta ez begiratzeko eskumuturrera esan digu, ez begiratzeko faborez otoi arren of course (zeinen kosmopolitak diren armiarmak neguan) susmagarriki esku-burdin forma hartzen ari diren erlojuei; ez egiteko galdera deserosorik, “zer eginen zenuke zuk baldin eta bat-batean hilezina zarela abisatuko balizute?”, “zer axola zaio zigor zeldetan dagoenari urtaroen aldaketa?” eta halakoak for example. Guk ez diogu kasu handirik egin eta denbora bezala izoztutako hegaztiez hizketan jarraitu dugu, itsasoaren gainean kulunkan dabiltzan oroitzapenez (bai, elurrezko hegaztia da gure bihotza, Eorann), Maria Lauraren bularrez, denboraren okupazioaz eta espazioaren desokupazioaz, kartzelaz, poesiaz eta Sarriz, batez ere Sarriz. Eta armiarma suizidatu egin da, haizeak laster desegingo duen hari fin bat soilik utzita. Zer da poesia izuen gordelekuetan, ihesa, iraultza edo galtzetan gordetzeko kopla?

Urtarrilaren 24an itzuliko gara Obabako Testiguak, ohi bezala, arratsaldeko 19etan, gure Jolas Etxeko erritu bekatarietara, “Zergatik Panpox” liburua besapean hartuta. Eta luxuzko gonbidatua izango dugu aldamenean: Arantxa Urretabizkaia. Bertan itxarongo dizuegu, kalizatik ardo goxoa irakurriz eta elkarren ahoetatik literatura edanez. Edo alderantziz.

nov 27, 2012
Bgaztelumendi

Sarriren Esperoan

Estragon eta Vladimir bezala gaude edalontzi erdi hustuetako aparrak hatzekin bildu eta mostradoreko ertzetan itsatsita. Denborari esnegaina egin zaio Pozzo eta Lucky agertu direnerako. Literaturaren funtzioaz galdetu diogu soka bat zintzilik daukan zuhaitz biluztuari: zain egotea al da literatura? Denbora irabaztea al da literatura? Eta noren zain dago idazten duena? Godoten esperoan? Eta Godotek ba al daki hemen lurpeko pasabideetako horma espraiatuetan esnegaina botatzen dutela kalegarbitzaileek denbora ezabatzeko? Ba al daki James Joycek ezagututako Dublin hartako ateek ostadarrak dauzkatela egurrean marraztuta? Denbora egiten ari garela egin gaitu denborak, eta literatura denbora egiteaz gain denborari eragitea ere badela dioen Arrasateko ahots lodi bat dator eszenatetegiaren tela beltzen atzealdetik, “bai, zain egotea absurdua da, idazleak izan behar du kronista ere, idazleak mundua bizi eta mundua aldatu behar du bere lumaz”; eta poesia mailu bat dela dioen Arestiren hitzekin oroitu da Obabako Testigua ordenagailuko tekladua egurtzen duen bitartean. Samuel Beckettek dio hitzak ez direla gai mundua adierazteko, gizakia ez dela gai bizi duen mundua ulertzeko, eta horregatik Estragon eta Vladimirri ez zaiela ezer gertatzen, bi aldiz. Modernismoa Normandiako hondartzaren batean tirokatu zuten burdinazko albatroek hodei beltzezko egunsenti batean, eta puskak bildu nahian ari gara izenik ez duten herrialdeetan, berea ez den izen batekin dabilen lagun izoztuaren moduan.

“Kartzelako Poemak” landuko dugu ABENDUAREN 27an, iluntzeko 19etan. Liburua lortu nahi duenak Klubeko bulegoan izango du eskuragarri gaur arratsaldetik aurrera. Zain egotearen absurdutik zain egitearen iraultzara pasako gara hilabete honetan.

nov 27, 2012
Bgaztelumendi

Eleketaldia asteburuan

Norbaitek pentsatuko du, “bai bai, ari dira hauek orain ere urte osoan ezer ez egin eta Euskararen Egunerako bazterrak nahasten, euskara egun bakarrean salbatu nahi duten parakaidistok”. Bueno, euskararik ez dugu salbatuko, baina ez da aitzakia txarra mingainak eta min azpiak astintzeko, ezta? Ostiral eta larunbat honetan autopistak baino egitarau zabalagoa prestatu dugu gure bide lokaztuen omenez. Ostiralean Amassorrain Ikastolako haurrek dantza emanaldia eta karaokea izango dituzte eguerdiko 15etan Kultur Etxea eta txokolatez zikinduko dituzte masailak gero. Iluntzean, berriz, MIHILUZE herrikoia egingo dugu, hiru kanporaketatan banatuta: Gure Kabian, Gazte Lokalean eta Jolas Etxean iluntzeko 19etan, 20etan eta 23etan.

Larunbata opari eta oparo etorriko da. Goizean, bezperako buru lanbrotuak argitzeko “Zergatik ez?” tailerra izango da Rezola Museoan 11:30etan. Ondoren, herri bazkaria eta MIHILUZE herrikoiaren finala. Arratsaldean Euskararen Gizarte Erakundeen Kontseiluak antolatuta manifestazioa egingo da 17etan hasita Anoeta Estadiotik. Eta eguna borobiltzeko, 22:30etan hasita, “Euskalduna naiz eta arraro nago” bakarrizketa elkarrizketatua osatuko dute “Barry Barrez” eta “Baltziskuetak”.

Mihiluze herrikoian eta larunbateko bazkarian izena emateko zerrendak Jolas Etxean daude. Ederra izango da Eleketaldia!

Páginas:12»

imagen

Foroko azken sarrerak

    Non Gaude?

    Galdeketa

    Gustoko al duzue Akultura.com blog-a?

    View Results

    Loading ... Loading ...